"YADDAŞLARDAN YURDDAŞLARA - SƏRRAF QASIM" - (AMEA-nın Naxçıvan Bölməsi tərəfindən Sərraf Qasımın yaradıcılğı haqqında hazırlanmış elmi-bədii televiziya verilişi)

Azərbaycan Milli Elmlər Akademiyasının (AMEA) Naxçıvan Bölməsinin İncəsənət, Dil və Ədəbiyyat İnstitutu ilə Naxçıvan Dövlət Televiziyasının birgə tərəfdaşlığı çərçivəsində ərsəyə gətirilən “YADDAŞLARDAN YURDDAŞLARA” adlı elmi-bədii televiziya layihəsinin 07.02.2020-ci il tarixli buraxılışı bütövlükdə Naxçıvan ədəbi-mədəni mühitinin görkəmli nümayəndəsi, ustad aşıq-şair Sərraf Qasımın zəngin irsinin analitik təhlilinə həsr edilmişdir. 

Verilişin aparıcılıq missiyasını folklorşünas alimlər, AMEA Naxçıvan Bölməsinin İncəsənət, Dil və Ədəbiyyat İnstitutunun Folklorşünaslıq şöbəsinin müdiri, filologiya üzrə fəlsəfə doktoru Elxan Yurdoğlu (Elxan Məmmədov) və AMEA Naxçıvan Bölməsinin İncəsənət, Dil və Ədəbiyyat İnstitutunun böyük elmi işçisi, filologiya üzrə fəlsəfə doktoru Aytən Cəfərova yerinə yetirmişlər. Layihənin xüsusi ekspert qonağı qismində isə görkəmli tədqiqatçı və folklorşünas alim, Naxçıvan Dövlət Universitetinin Azərbaycan dili və ədəbiyyatı kafedrasının müdiri, filologiya üzrə elmlər doktoru professor Əsgər Qədimov çıxış etmişdir. Akademik diskussiya formatında hazırlanan bu verilişdə ustad Sərraf Qasımın nadir lent yazıları əsasında, onun öz ifasında səslənən bir sıra aşıq havaları da tamaşaçıların diqqətinə təqdim edilmişdir.

Veriliş zamanı arxiv faktları işığında Sərraf Qasımın Naxçıvan aşıq mühitini çağdaş dövrdə yenidən canlandıran fundamental bir sima olduğu əsaslandırılaraq, onun Şahbuzun Aşağı Qışlaq kəndindəki fərdi saz məktəbində iyirmiyə yaxın kamil şəyird yetişdirməsi, bununla da bölgədə genişmiqyaslı saz məktəbinin əsasını qoyması və Tovuzun məşhur sazbəndi Usta Xudu ilə dostluq əlaqələri sayəsində əldə etdiyi sazları tələbələrinə təmənnasız surətdə paylaması böyük sənət fədakarlığı kimi qiymətləndirilmişdir. Verilişdə Sərraf Qasımın ümumazerbaycan aşıq sənəti kontekstində müxtəlif bölgələrin sənət nümayəndələri ilə qurduğu əhatəli və zəngin yaradıcılıq əlaqələri fundamental şəkildə təhlil olunmuşdur. Sərraf Qasımın öz həyatını və ədəbi əlaqələrini ehtiva edən irfani-realist əsərləri ilə Naxçıvan aşıq mühitində avtobioqrafik dastan janrının əsasını qoyması onun sənətkarlıq dünyasının orijinal dəsti-xətti kimi önə çəkilmişdir. Verilişin yekununda Sərraf Qasımın Şərq poeziyası və ozan-aşıq sənəti kontekstində “Dədə Aşıq” tituluna layiq bir ustad olduğu xüsusilə qeyd edilmiş, bu fundamental irsin gələcək nəsillərə sistemli şəkildə ötürülməsinin milli mədəniyyətimizin qorunması baxımından strateji vacibliyi vurğulanmışdır.

Aşağıdakı pleyerdən bu televiziya verilişini tam variantda izləyə bilərsiniz: 

✦ ▬▬▬ ✦ ▬▬▬ ✦

⚠️ DİQQƏT: 
Aşağıdakı sayta daxil olmaqla Sərraf Qasımın həyatı və yaradıclığı barədə, onun yaratdığı aşıq məktəbi və ədəbi məktəb haqqında daha ətraflı məlumatlar əldə etmək mümkündür: 
wwwSarrafQasim ➤